* ( الواقع قد يكون اسوأ وأصعب من أي خيال ..)
قصتي طويلة
اشتغلت بمحل صاحبه حبني حب جنون .. رفضت هالحب ورفضته، شو بدي بواحد خمسيني وعنده مره وولاد قدي واكبر.. تركت الشغل وريحت راسي
ضل يطوشني رسايل واتصالات وبيوم عشان اخلص منه قلت لأمي ردي يما عليه وبهدليه مشان الله لانو قرفني ..حكتلي هاتي رقمه حتصل عليه وامسح فيه الارض خليه يستحي ع شيبته..
اخدت رقمه وفعلا بهدلته بالذوق وحكتلو أبعد عن البنت
و اذا ضليتك تزعجها رح اضطر احكي لاخوتها وهني يتصرفوا معاك ..
انا هون قلت خلص خلصت منه وراح بحال سبيله
بعد فترة بسيطة اجا شب خطبني تقليدي لاني من النوع الراكز الحمدلله واي شي بين الشب والبنت قبل الخطبه او كتب الكتاب بعتبره غلط وما الو داعي يصير وكل شي اله حساب ..
المهم هالشب منيح وابن حلال اشتغل بالأصول هو وأهله
اتفقنا انا واياه وكنا قراب ع بعض بالتفاهم والأفكار والأمور مشيت وتيسرت
هالشب مقيم بره ..
كتبنا الكتاب وأخد عقد الزواج وكل الأوراق المطلوبه لحتى يسحبني لعنده ويعمل لم شمل
انا مبسوطه ومرتاحه وأهلي مرتاحين وكل شي طبيعي
بيوم بكتشف بطريقة أو باخرى انو امي لسا بتتواصل مع هداك الشايب ابن ...
وفي بينهم حكي وسلامات وصباح الخير ومساء الخير
وطبعاً هو بسأل عني بكل المحادثات وهي بتحكيله اني بخير وأبصر شو ..
لحد ماشفت حكتلو البنت انكتب كتابها وحتسافر لعند جوزها ..
أنا هون طار عقلي بس كيف بدي أواجهها حتعرف اني شفت التلفون وحتصير كارثه بالبيت
رحت عند اخوي لبيته وشرحتله الوضع .. حكتله مجرد التواصل معاه وتوصلو اخباري هاد غلط .. خلص شو بدو فيي وشو بدنا فيه ..
أخوي ماهان عليه وقال الموضوع عندي انتي لاتحكي شي انا بتصرف..
(مع العلم ابوي وامي منفصلين وابوي متزوج ومستقر بحياته ومابهمه امرنا كثير يعني متل الغريب بسأل من بعيد لبعيد)
اجا اخوي وفاتح امي بالموضوع وحكالها انا شفت الرسايل ومين فلان وشو بدو من اختي
اختي بحكم المتزوجة وعيب اللي بصير
امي عصبت وقالت انا مش راضيه عن زواجها ومابدي اياها تسافر وتتغرب ويمكن هاد اللي اخدته يطلع عاطل و وسخ وهي بالغربه مين يوقف معها وحضل ورى الموضوع ليطلقها .. انا سمعت هالحكي جنيت حكتلها ليش توافقوا من الاول طيب وليش تخلوني اكتب الكتاب ؟؟!!! والشب منيح وماشفت منه الا كل خير شو السبب ؟؟؟
حكتلي لا فلان احسن منه بمية مرّة ( قصدها عن الشايب) ومعاه مصاري ورح يشتريلك بيت وسياره وخدم وحشم انتِ بس وافقي
اخوي قال هاد الشي حرام بدك تزوجيها وهي متجوزه ؟؟؟!
المهم صارت مشاكل ومشاكل وكل يوم وامي بنفس القصة فلان وفلان وبدو اياكي وبدو يجيبلك وانتي غبيه مش عارفه مصلحة نفسك وانا نفسيتي تتحطم أكتر وأكتر وخطيبي بعيد، أحاول ما احسسه بشي
و أضل اساله امتى رح تاخدني وشو صار بالأوراق
وهو يطمّني ويحكيلي هانت شوية إجراءات وبتيجي
ماعارف اللي بصير معي..
بصراحة انا تمسكت فيه وموقف امي صدمني صرت بدي اطلع وابعد عن الكل وكنت ادافع عنه بوجهها لدرجة تقوم تضربني وتكسّرني و تضغط علي اتركه واخد هداك ..
بعدها اكتشفنا انو هو بيدفع أجار بيتنا وبيعطي امي مصاري وهي بتعشمه انو بصير خير وحضل وراها لتتركه
ما نفع معي شي انا وضليت متنحه ع خطيبي، تركت بيت امي رحت عشت بدار اخوي فترة بس المشاكل بتزيد وبتزيد
بيوم خطيبي بحكي معي وبقلي أجاني رقم من عندكم واحد بهدد فيه وبحكيله انت اخدت خطيبتي وحبيبتي اتركها أحسنلك .. وضلت هالارقام ترن عليه كل فتره وهالشخص يحكيله أشياء بتصير جوا بيتنا يعني حسسه انو منا و فينا وبيعرفنا منييييح
خطيبي ما سألني غير لما كترت هالاتصالات وصار بدو يعرف مين هاد وشو هدفه
حكالي وسألني انا تفاجأت ..قلت ببالي معقول امي !!
طلع هداك الشايب الله ياخده امي عاطياه رقم خطيبي وحكتلو انا مش قادرة أقنعها ولا اخليها تتركه .. انت خرب بينهم
خطيبي دخل الشك لعقله وانا أحكيله مافي شي كلو كذب وهبل لا تصدق وترد
شو أحكيلووو!!!
امي ورى الموضوع !!!!
كان همي ما أشوه صورة أهلي قدامه عشان يضل يحترمني
وبالاخر هداك الحقير حكاله انا بصرف عليهم وبدفعلهم أجار البيت وبدي البنت وأمها وعدتني تكون الي طلقها احسنلك
خطيبي فقد عقله وصار يسب علي وعلى أهلي ومع هيك أنا أدافع وحكيتلو لاتستعجل وتحكم بدون ماتفهم تعال ونتناقش .. انجرحت منه كتير ورفض انو يجي وقال انا مش مطلقك روحي خلي امك تطلقك بالمحاكم .. وقطعني بعدها سنة كاملة وانا صابره مابدي اتطلق منه ضليت على أمل انو يجي ويفهم مني ويصدقني
لكن ما أجى واختفى من حياتي
بعدها قلت خلص يابنت شكلو بايع ومستغني بكفي انو ظلمني
امي كانت مبسوطه بوضعي وهداك مبسوط انو اختلفنا
رفعت دعوى تفريق وتطلقت منه ولهلأ ما سأل ولا كلّف خاطره يحكي معي او يجرب يفهم شو صار..
وهداك الحقير لسا متأمل اني اقبل وامي لسا بتزن وبتزن
انا تعبت نفسيتي لكن مستحيل بيوم أقبل فيه
مش زعلانه عاللي راح
زعلانه لانو علاقتي بامي خربت وصارت فجوه كبيرة بينا
الله يسامحك يا امي
